Албанската полиција уапси 53-годишен државјанин на Северна Македонија, осомничен дека изнајмен стан во Валона го користел како логистичка база за чување и пакување наркотици наменети за улична продажба.
Според информациите, осомничениот со иницијали Б.Л. изнајмил стан во населбата „10 Корику“, каде полицијата при претрес пронашла кокаин, канабис, електронска вага и повеќе мобилни телефони. Постои сомневање дека дрогата во станот била препакувана во помали дози за понатамошна дистрибуција.
Во рамки на истата акција, албанските власти покренаа постапка и против двајца локални државјани, за кои се претпоставува дека биле соучесници во криминалните активности.
Од полицијата информираат дека истрагата продолжува со цел целосно расчистување на случајот и откривање на сите членови на дилерската мрежа.
