Во обемна акција на МВР и Јавното обвинителство, приведени се 14 лица осомничени за организирање мрежа за нелегален увоз и продажба на медицински средства за естетски зафати, меѓу кои ботокс и дермални филери.
Според официјалните информации, поднесени се кривични пријави против 19 физички лица и шест правни субјекти. Дел од приведените веќе се изведени пред судија на претходна постапка во Основниот кривичен суд Скопје, каде што за дел од нив се предложени мерки на претпазливост, а за други е побаран притвор.
Од МВР информираат дека осомничените организирале криминална група која набавувала фалсификувани медицински производи од Србија, Кореја и Турција, кои потоа нелегално биле внесувани, складирани и дистрибуирани низ земјата. Овие производи се употребувале при естетски третмани врз пациенти.
Во акцијата се опфатени и доктори од здравствени установи, како и сопственици на приватни ординации. Според истрагата, нелегалните активности биле организирани преку правни лица лоцирани во Скопје и во други градови.
Надлежните институции нагласуваат дека станува збор за сериозно кривично дело кое директно го загрозува здравјето на граѓаните, бидејќи производите биле увезувани и користени без соодветни дозволи, контроли и одобренија од надлежните органи.
