Ученик во седмо одделение од основно училиште во Битола на социјалната мрежа ТикТок објавил список со имиња и презимиња на свои соученици, заканувајќи се дека ќе ги „ликвидира“. Во објавата бил наведен и конкретен датум.
Директорот на училиштето „Стив Наумов“, Николе Пискачев, изјави дека по случајот бил одржан родителски состанок и биле известени МВР, Центарот за социјални работи и надлежните образовни институции. Тој посочи дека инцидентот се случил надвор од училиштето и наставниот процес.
„Во рамките на нашите надлежности, училиштето презеде соодветни мерки за заштита и поддршка на учениците, како и активности за смирување на состојбата и создавање безбедна и сигурна средина за сите ученици и вработени. Апелираме до јавноста за воздржаност од ширење непроверени информации и за почитување на приватноста и достоинството на сите инволвирани лица, особено имајќи го предвид фактот дека станува збор за малолетници. Безбедноста и благосостојбата на учениците останува наш највисок приоритет и училиштето ќе продолжи да соработува со надлежните институции до целосно разрешување на случајот“, изјави Пискачев.
Од училиштето велат дека веднаш реагирале по претставка од група родители, а институциите ќе постапуваат понатаму за целосно расчистување на случајот. Според информациите, родителите на ученикот најавиле дека ќе го префрлат детето во друго училиште.
