Опозициската СДСМ преку соопштение оцени дека премиерот Христијан Мицкоски го блокира европскиот пат на државата, со став дека тој одбива да ги исполни условите за продолжување на преговорите со Европската Унија.
Од партијата наведуваат дека изјавите на Мицкоски за уставните измени и неговиот став дека државата може да чека и со децении, се спротивни на европските барања за напредок во процесот.
СДСМ посочува дека прашањето за уставните измени е европско, а не билатерално, притоа повикувајќи се на пораките од европските претставници, меѓу кои и Марта Кос, која, како што наведуваат, порача дека „нема место за тројански коњи“.
Во соопштението се цитираат и изјавите на Мицкоски дека нема да отстапи од својот став во однос на уставните измени, како и дека државата е подготвена да чека доколку е потребно.
СДСМ оценува дека ваквите политики водат кон застој во евроинтегративниот процес и ги повикува властите да ги исполнат условите за продолжување на преговорите.
Од партијата најавуваат дека ќе продолжат со политичкото делување во насока на, како што велат, европска иднина на државата.
