Основното јавно обвинителство Гостивар донесе наредба за спроведување истражна постапка против лице од Скопје, осомничено за кривично дело „силување дете кое не наполнило 15 години“, како и за „злоупотреба на туѓа снимка, фотографија, аудиозапис или спис со сексуално експлицитна содржина“.
Како што соопшти Јавното обвинителство, 28-годишниот осомничен, вработен во основно училиште, навел 14-годишно девојче да му испрати свои фотографии и видеа со сексуално експлицитна содржина, а потоа ја уценувал дека ќе ги објави доколку не се сретне со него.
— Детето жртва прифатило да се сретнат, по што осомничениот го однел во куќа во гостиварско каде што извршил обљуба, дело за кое е предвидена затворска казна од најмалку осум години. Месецов тој повторно се обидел да ја уцени за нова средба, но откако девојчето одбило, тој на социјална мрежа ги објавил експлицитните фотографии и видеа. Со тоа ги направил достапни за трети лица, со што го исполнил битието и на второто кривично дело, воведено во февруари годинава, за кое е предвидена затворска казна од 3 до 10 години — информираат од Обвинителството.
Имајќи ги предвид високите запретени казни, јавниот обвинител оценил дека постои висок ризик осомничениот да се даде во бегство за да го избегне кривичниот прогон.
— Исто така, постои опасност тој да влијае врз жртвата или да го повтори делото. Поради тие причини, до судијата на претходна постапка е доставен предлог за определување мерка притвор — се додава во соопштението на ЈОРСМ.
