Цената на електричната енергија ќе се одредува според понудата и побарувачката, наместо преку административни одлуки, изјави директорот на МЕМО, Зоран Ѓорѓиевски, по почетокот на тргувањето на пазарот „во тековниот ден“.
Станува збор за нов сегмент од организираниот пазар на електрична енергија, познат како „интрадеј“ пазар (intraday market), кој овозможува купување и продажба на струја во текот на самиот ден на испорака. Со тоа, учесниците на пазарот добиваат можност побрзо да реагираат на промените во производството и потрошувачката.
Ѓорѓиевски посочи дека цената на организираниот пазар се формира врз основа на реалната понуда и побарувачка, што треба да обезбеди појасни ценовни сигнали за производителите, снабдувачите и потрошувачите.
Интрадеј-пазарот има значајна улога бидејќи електричната енергија се произведува и се троши речиси истовремено, па балансот меѓу понудата и побарувачката мора постојано да се одржува. Новиот модел овозможува корекции во текот на денот, особено при промени во производството од обновливи извори или во потрошувачката.
Од МЕМО очекуваат дека воведувањето на овој механизам ќе придонесе за поголема транспарентност, поефикасно тргување и усогласување на домашниот пазар со европските правила.
