Повеќе од 100 патници и членови на екипажот се заразиле со норовирус на крузерот „Карипска принцеза“ (Caribbean Princess), соопштија Центрите за контрола и превенција на болести (CDC).
Според официјалните информации, симптоми како дијареја и повраќање се појавиле кај 102 патници и 13 членови на екипажот. Епидемијата била регистрирана во текот на повеќедневното патување кое започнало на крајот на април.
Крузерот моментално плови во северозападниот дел на Атлантскиот Океан кон Доминиканската Република, по што треба да пристигне во Порт Канаверал, Флорида. На бродот престојуваат вкупно 3.116 патници и 1.131 член на екипажот.
Како заштитна мерка, спроведена е засилена дезинфекција и чистење на сите заеднички простории, а лицата со симптоми се ставени во изолација. Од компанијата „Принцес Крузис“ (Princess Cruises) соопштија:
„Брзо го дезинфициравме секој дел од бродот и воведовме дополнителни протоколи за чистење за време на патувањето.“
Компанијата најави дека по пристигнувањето во Флорида, бродот ќе помине низ целосна дезинфекција пред следното испловување. Надлежните посочуваат дека појавата на норовирус е честа појава кај крузерите и нагласуваат дека овој настан не е поврзан со случајот со хантавирусот на бродот „МВ Хондиус“ (MV Hondius).
