Турскиот претседател Реџеп Таип Ердоган оствари средба со делегација на палестинското движење Хамас во Истанбул. Разговорите се одржаа во претседателскиот кабинет во палатата „Долмабахче“.
Според официјалните информации од Анкара, во фокусот на средбата била актуелната состојба во Појасот Газа, со посебен осврт на тековните случувања и воените дејствија во регионот. Турската страна соопшти дека за време на разговорите детално се анализирала хуманитарната криза, која останува приоритетна тема во меѓународните активности на Турција.
Оваа средба доаѓа во период на интензивна дипломатска активност на Анкара. Турските власти во повеќе наврати ја нагласија својата поддршка за итен прекин на огнот и за изнаоѓање трајно решение за стабилизација на ситуацијата.
Во рамките на разговорите, беше истакната потребата од непречена испорака на хуманитарна помош за цивилното население во Газа, како и напорите на Турција за деескалација на конфликтот преку дијалог со регионалните и меѓународните фактори.
