Иранските власти приведоа најмалку 50 лица во обемна безбедносна операција спроведена во повеќе провинции, под сомнение за шпионажа и соработка со странски разузнавачки служби. Според официјалните соопштенија од Техеран, уапсените се обвинети за собирање и споделување чувствителни податоци, вклучувајќи ги локациите на клучната инфраструктура и воените објекти, кои наводно биле цел на потенцијални напади.
Операцијата е дел од пошироката кампања на иранските безбедносни сили за неутрализирање на шпионски мрежи, во услови на постојана ескалација на односите со САД и Израел. При апсењата била запленета софистицирана електронска опрема и сателитски уреди, а осомничените се товарат за дејствување во корист на „непријателски држави“. Ваквите акции се зачестија во текот на конфликтот, како дел од стратегијата на властите за затегнување на внатрешната безбедност.
Иако идентитетот на приведените останува тајна, најавени се строги судски процеси со можност за најтешки казни според националното законодавство. Овој случај дополнително ја вжештува атмосферата во регионот, каде обвинувањата за саботажа и разузнавачки инфилтрации стануваат секојдневие во контекст на тековната безбедносна криза.
