Лидерот на турската партија „Ватан“, Догу Перинчек, најави иницијатива за повлекување на Турција од НАТО и формирање нов стратешки сојуз.
Тој изјави дека неговата партија ќе предложи платформа која предвидува напуштање на Алијансата, како и целосно редефинирање на надворешната политика и безбедносната позиција на земјата. Перинчек упати повик до сите политички сили во Турција да го поддржат овој курс и да се приклучат кон создавање алтернативен блок.
Според него, Турција мора да го преиспита своето членство во НАТО, нагласувајќи дека напуштањето на Северноатлантскиот сојуз е неопходен чекор за заштита на националните интереси во иднина.
Тој истакна дека политиките на САД и Израел имаат пресудно влијание врз одлуките во рамките на НАТО, што, како што тврди Перинчек, не е во согласност со интересите на Турција и дел од европските држави.
Дополнително, во неговото излагање беше посочено дека Турција се соочува со сериозни притисоци поврзани со регионалните прашања, вклучително и споровите во Источниот Медитеран и Егејското Море, каде интересите на земјата честопати се коси со оние на останатите членки на Алијансата.
