Силна експлозија на гас се случи во централниот дел на Истанбул, при што се урнаа две згради и повеќе лица беа повредени.
Инцидентот се случил околу пладне во населбата Фатих. Според првичните информации, експлозијата најверојатно била предизвикана од истекување на природен гас.
Спасувачките екипи веднаш пристигнале на местото и започнале акција за извлекување на луѓето од урнатините. Се проценува дека неколку лица биле затрупани, од кои дел веќе се извлечени и пренесени во болница.
Според локалните власти, повредените не се во критична состојба, додека потрагата по евентуални други лица продолжува.
Очевидци изјавиле дека експлозијата била многу силна и предизвикала голема материјална штета во околината. Полицијата го обезбедила местото, а надлежните служби започнале истрага за точната причина.
Властите апелираат граѓаните да ја избегнуваат областа додека трае спасувачката операција.
