Портпаролот на Кремљ, Дмитриј Песков, изјави дека Русија останува подготвена да го разгледа предлогот за складирање на иранскиот збогатен ураниум, доколку постои интерес од сите засегнати страни.
Тој појасни дека ваквата иницијатива и претходно била предмет на дискусија, но тогаш не наишла на поддршка од сите инволвирани страни. Според Песков, претседателот Владимир Путин ја задржува подготвеноста повторно да го отвори ова прашање во рамките на меѓународните дипломатски напори.
Во однос на тензиите на Блискиот Исток, Песков нагласи дека Русија не е дел од конфликтот и дека Москва инсистира на изнаоѓање дипломатско решение. Тој додаде дека Русија се надева на одржување на прекинот на огнот и на одбегнување на каква било понатамошна ескалација.
Ситуацијата во регионот, особено во Персискиот Залив, останува критична со зголемени безбедносни и економски ризици. Песков предупреди дека тековните тензии веќе вршат сериозен притисок врз глобалната економија и светските енергетски пазари.
Кремљ уште еднаш ја потврди својата позиција како доверлив снабдувач на енергенси, најавувајќи продолжување на соработката со глобалните партнери и покрај сложените геополитички предизвици.
-1773573599567-964172075.jpg)
