Шпанија, Словенија и Ирска побараа од Европската Унија да отвори дебата за можно суспендирање на Договорот за асоцијација со Израел, изјави шпанскиот министер за надворешни работи, Хосе Мануел Албарес, пред состанокот на шефовите на дипломатиите во Луксембург.
Според официјалните информации, трите земји упатиле заедничко барање до ЕУ со цел итно да се преиспита односот на Унијата кон актуелната состојба на Блискиот Исток, особено во контекст на ескалацијата на конфликтите и обвинувањата за прекршување на човековите права.
Иницијативата доаѓа во време кога расте притисокот врз Брисел за преземање поконкретни чекори. Шпанските власти сметаат дека ЕУ треба да испрати „силен сигнал“, нагласувајќи дека одредени политики на Израел се во спротивност со принципите на договорот, кој вклучува задолжително почитување на човековите права.
Слични повици упатија и други меѓународни актери. Повеќе од 60 организации и синдикати, како и над еден милион европски граѓани преку граѓанска иницијатива, побараа суспензија на договорот, повикувајќи се на ситуацијата во Газа, Западниот Брег и Либан.
Сепак, и покрај зголемениот политички притисок, ваквата одлука тешко може да се реализира. За целосна суспензија на договорот е потребен широк консензус меѓу земјите членки, кој засега недостасува, со оглед на тоа што дел од државите се противат на воведувањето вакви мерки.
Дебатата во рамките на ЕУ продолжува, а исходот ќе зависи од тоа дали ќе се обезбеди доволна поддршка за конкретни чекори или сè ќе остане на ниво на политички притисок и дипломатски пораки.
