Американскиот претседател Доналд Трамп престојува во посета на Кина на средби на високо ниво со кинескиот претседател Си Џинпинг. Тој е придружуван од делегација составена од влијателни американски бизнис-лидери, меѓу кои и Илон Маск и директорот на „Nvidia“, Џенсен Хуанг.
Според „Ројтерс“, Хуанг бил додаден во делегацијата во последен момент, откако Трамп лично го поканил да се приклучи на патувањето. Неговото присуство се смета за особено значајно поради разговорите поврзани со продажбата на напредни чипови за вештачка интелигенција (ВИ) на „Nvidia“ во Кина.
Во делегацијата се вклучени и претставници на големи американски компании како „Apple“, „Boeing“, „BlackRock“, „Qualcomm“, „Visa“ и „Mastercard“. Главен фокус на посетата ќе бидат трговските односи, технолошката соработка и вештачката интелигенција.
Американските медиуми наведуваат дека администрацијата на Трамп се обидува да постигне нови економски договори со Пекинг, додека американските компании бараат полесен пристап до кинескиот пазар и олеснување на деловните ограничувања.
