Администрацијата на американскиот претседател Доналд Трамп упати закана дека ќе ги поништи визите за палестинската делегација во Обединетите нации доколку палестинскиот амбасадор Ријад Мансур не ја повлече својата кандидатура за потпретседател на Генералното собрание на ОН. Ова се наведува во интерен меморандум на Стејт департментот.
Во документот испратен до амбасадата на САД во Ерусалим се посочува дека кандидатурата на Мансур „ги разгорува тензиите“ и го поткопува мировниот план на Трамп за Газа. Вашингтон порача дека ќе ја смета Палестинската самоуправа за одговорна доколку кандидатурата не биде повлечена и предупреди дека во тој случај „ќе следуваат последици“. Како можна мерка се споменува преиспитувањето на одлуката од септември минатата година, со која на палестинските претставници при мисијата во Њујорк привремено им беше овозможено изземање од визните санкции.
Палестинскиот амбасадор во февруари веќе се откажа од трката за претседател на Генералното собрание под притисок на САД, но остана кандидат за едно од потпретседателските места. Иако оваа функција е со помал профил, Вашингтон стравува дека позицијата би му овозможила на Мансур да претседава со седници на Генералното собрание, вклучително и оние поврзани со Блискиот Исток.
Палестинците во ОН имаат статус на држава набљудувач која не е полноправна членка и немаат право на глас во Генералното собрание. Изборите за раководните тела на Генералното собрание на ОН се закажани за 2 јуни.
