Украинскиот министер за надворешни работи, Андриј Сибиха, изјави дека еден ден војна со Русија ја чини Украина околу 450 милиони долари, нагласувајќи дека највисоката цена што ја плаќа земјата е загубата на животите на украинските војници.
Говорејќи на конференцијата „Стратешка арка“, организирана од Полскиот институт за меѓународни односи (PISM), Сибиха истакна дека Украина е „многу блиску до моментот кога времето би можело да почне да работи во нејзина корист“, пренесува агенцијата УНИАН.
Според него, руската економија покажува знаци на ранливост, додека поддршката за рускиот претседател Владимир Путин во Русија, како што тврди тој, „опаѓа“.
„Гледаме дека нешто се случува таму. Имаме наши разузнавачки податоци и проценки од нашите партнери“, изјави Сибиха, додавајќи дека Украина сака да го зголеми притисокот врз Русија со различни средства за да се стави крај на војната.
Украинскиот министер оцени дека тековната година може да биде клучна за постигнување мир, но нагласи дека Украина сè уште трпи огромни финансиски и човечки загуби.
„Највисоката цена е крвта на украинските војници“, рече Сибиха.
Изјавите на министерот доаѓаат по проценките на Институтот за проучување на војната (ISW), според кои во моментов нема индикации дека Русија планира наскоро да ја прекине војната, и покрај претходните сигнали од Москва за можен крај на конфликтот.
